Til foreldre/føresette

Som foreldre lurer de gjerne på om det er trygt å sende dykkar son/dotter på bLAN. Svaret er JA!

bLAN er ein ungdomsfestival med variert aktivitetstilbod og fokus på det sosiale, der folk med ulik grad av interesse for data møtast. Kvar gong har vi i overkant av 150 deltakarar med datamaskin, i tillegg til mange som er der for å ha det kjekt og vere med på alle dei sosiale aktivitetane og tilboda våre. Nedre aldersgrense for å vere deltakar med datamaskin og vere til stades om natta er at du må ha byrja på ungdomsskulen, altså frå og med 8. klasse. Deltakarane våre er somregel mellom 12 og 25 år, der aldersgruppa som dominerer er rundt 16 år. bLAN er eit rusfritt arrangement med sterk fokus på tryggleik og at alle skal trivast heile helga.

I tillegg til dette har vi eit eige tilbod for dei som går i 5.-7. klasse på barneskulen, kalt bLAN Super. Her får dei ein smakebit på festivalen der dei kan ta med seg datamaskin og/eller konsoll for å vere til stades på dag- og kveldstid.  Også her er det vaksne vakter til stades. Les meir om dette opplegget under "Om bLAN" i menyen.

Vi gjer også vårt beste for å sørge for eit godt kosthald for deltakarane våre. I tillegg til kiosken tilbyr vi difor ein eigen matbillett som kan kjøpast separat i butikken vår på Geekevents samtidig som ein kjøper deltakarbillett. Denne kostar 199,- og inkluderar to middagar (laurdag og søndag) og tre frukostbuffetar (laurdag, søndag og måndag).